Aktionen

Wann mann j ome Zitwe wyns machenn will Sol man nemenn ein ome guts seines wyns vom bestenn gewechs unnd wie er vonn der kelter geth so ein sack zwey oder druwe mall gedruckt ist, unnd Ome nach sovil Zukelternn hait Das ist angewechts der mittelst wynn, der ist nit raib auch nit sauwer vonn denn drueckenn / Item dieselbig ome wyns soll mann thun In ein sauberenn kessell, unnd das tritteyll woll Lassen insedenn und sauber verscheuwmenn unnd so er nach Im kessell ist, sol mann diese nachgescharbent wurz, (die nit zuw kleynn gestossenn sein soll) darin thun und wol mengenn item iiij loit Ingwer It(em) iij loit negellen und iiij loit Zymmats

Darnach sol mann denn wynn In ein sauber buthis thun, darin lassenn vergerenn unnd kalt werdenn, unnd wan kein dampff mehr davonn geht, das man ein finger woll darin haltenn mag, Sol man dann wynn mit eine tuch zain zudeckenn, Unnd so er woll erkaltet, In abermals reynn schaumen unnd zur dann In suwber feßlein thun, unnd aber sovyl der abgescharbenn wurz nemenn, die Zurkuntschen und nit clein stossenn unnd alsdann inn eyne clein schmall secklein thun das lang ist Dasselbig mitten in denn wynn henckenn, Und so man davonn drincke, das secklin ye langer ye mehr, las hinab sanckenn, damit es alleweg inn dem wynn hange.

Nota man mag auch denn obgnantenn wynn, so mann daruß trinckt mit eynem gesottenn guttenn wyn (als alant) eynn zytlang widder fullen, Das schat Ime nichts Nach so man denn Zytwen wynn Getrinckt, mag man ein ändernn gutenn wynn Inn das feslein fullenn, wan er gewint [darum] gar ein sehr gutenn geschmack.