,,Wann also die Wasserleitungen gereiniget, und die Gräben gemacht werden, so liegt so dann der Obrigkeit ob, durch darzu bestellte Visitatores zum öfftern Vorsehung zu thun, daß die gereinigte Gräben nicht wiederum mit Koth oder andern Unreinigkeiten angefüllet werden, als welches ein Uberlauffen und Ergießung des Wassers, und andere Unordnung verursachet; insgleichen, daß die Bäche, die Wasser-Röhren, die Oerter durch welche man sie leitet, die

Wasser-, Röhr- und Brunnen-Kästen, wodurch der Stadt des Wassers zugeführet und distribuirt wird, und die offentliche Wasser-Behälter, weder wissentlich und vorsetzlich, noch nachlässiger Weiß durchbohret, zerbrochen und zerstossen, noch in andere Wege verderbet werden, daß das Wasser in die Stadt nicht fließen, fallen, kommen, oder geleitet werden kann."

Über die Brunnenverbrechen steht folgendes: ,,Wann man die Brunnen vergiftet, so wird ein solcher Thäter nach dem Jure Civilii, mit dem Schwerd, und nach der Peinlichen Hals-Gerichts-Ordnung Kayser Carl des V. an denen Männern mit dem Rad, an denen Weibs-Personen mit der Ertränckung bestraft. ...Wann einer die Quell-Adern des Brunnens verstopft, vernichtet oder zurückweiset und hiedurch ein solcher Wasser-Mangel entstehet, daß Menschen und Vieh für Durst crepirn müssen, so kann diß Verbrechen mit dem Tod abgestraft werden."

Wie durch beide Fürsten geordent ist das der Bronnfluß vom Galgenberg zu Creutznach halb den Barfüssern und halb derselben Stat darinn er gelegt ist dienen soll.

Von Gots gnaden Wir Philips Pfaltzgraue by Rine Hertzog jnn Beyern des heiligen Romischen Richs Ertzdruchses und Kurfurste, und wir Johans auch Pfaltzgraue by Rine Hertzog inn Beyern und Graue zu Spanheim &c. bekennen offentlich jn diesem briff fur uns und unser Erben &c. Als ein Nuwe Closter der myndern Bruder Sant Franciscen ordens zu Creutznach erhebt, erbuwt und gestifft ist, darzu beide unser Vatter und vetter Pfaltzgraue Friderich und Hertzog Friderich &c. gnad und neygung gehabt, den buw gefurdert und verlegt han, das sich ein redlich Convent darjnn wole behelffen mag, damit des uns nit zwifelt sie ir selen heil gein dem almechtigen Got gewirckt, und den zu ewigen Rugen geholffen han, auch noch vil menschen der gutten werck so da gescheen teylhafft werden mogen. Wann aber solch Closter alleyn an flisenden bronnen gebrech gehabt, damit sie nit versehen gewest, aber vil irer und des Closters notturfft dadurch zu wenden han, auch on das ir wesen nit so geruglich het mogen bestehen, so haben wir sie in crafft dis briffs mit einem pronnen qwelle am Galgenberg das waser sie da zusammen gefast und jn ein waserstuben bracht, und von dannen furbaß hin jne jn dolen gefurt, gefast und geleit han durch das hochenheimer tore bis zu dem huse genant zum Rebstock, nu uff das die egenante Bruder mit den Burgern deste fridlicher sich des Bronnens halp halten und solchen flus und bronnen in kunfftige zit gehandthaben mogen, so haben wir verordnet mit der Bruder wissen und willen und unsern willen auch darzu geben, das hinfur zu ewigen dagen solcher pronnenfluß halb der Bruder sin, und in das obgenant Closter dienen und der ander teil den Burgern zu Crutzenach jn dem teil der statt darjnn das egemelt Closter ligt sin soll den hinfur zu leiten, zu furen, und zu handthaben von der wasser stuben bis an den teilung stocke der zum Rebstock stet, in dem selben stock der auch darnach als es nutzlich und wole gesin mog erhaben darzu geschickt und gestelt werden soll, das solich wasser glich halp und halp yeden teil folg und werden von dannen Bruder jren teyl gleich zum Closter, und die burger jren teil da der bronnen, jne zu nutz springen wirdt, furen, buwen, halten und handthaben sollen und die wasserstub am ursprung und der bronnenstock, darjnn der bronnen geteilt wirdet, und was da zuschen zum Bronnen gehort sol glich gemeyn sin, und iglichs zwey slos und zween slussel han das die brudere on die burger und die burger on die bruder garumb nit geen, und das wasser so es recht leuffet mit fortel nit geandert wird, und wo der teilstock abginge oder schaden nemme von fule des holtz, oder fust so mogen die beide parthien, und keyner on die ander ein andern stock der zur teilung gerecht sy setzen, steynen, erin oder hultzen, als dick des not geschicht, doch das er keynen teil veruckt wird das jme sein teil wassers nit zu flisen moge so vil jme zugehort unuerhindert. Und so buwes an dem pronnen oder fertigung des wassers bis an teilstock und demselben stock not wurdt, so sol gescheen mit beiderteil ratte, und uff costen unser burger die des bronnen genyssen und auch der Bruder so vil sie sich von Ordens wegen zu uerbynden haben, und von dem teil stock fur uss soll yder sin teil wassers uff sin costen furen, leyten und fertigen dahin es gehort, alles on geuerlich. Es soll auch keyn teil macht haben eynichen flus dauon zu geben oder zu nemmen oder jemant andern zuzuwenden, so soll des auch nymant selben nemmen, keyns wegs ongeuerlich, heissen und gebieten allen und iglichen unser ober und unter amtluten Truchsessen Landtschribern auch Schultheissen Burgermeistern, reten gerichten, burgern, und jnwonern wer die sint, das sie by solcher ordenung des wassers beidteil getrulich handthaben, und nit gestatten das sich yemants gegen den andern fortels oder behendickeit gebruch, sunder uffrecht glich und recht gehalten wird by verlisung unser gnad und swere pene zu uermyden. Des zu urkund haben wir beide Fursten unsir yder sin Jngesigel thun hencken an disen brieff. Datum Heidelberg uff mitwoch nach sant Erharts tag. (14. Jan.) Anno &c. LXXXIX°.